السلام عليكم ورحمة الله وبركاته
.
.
الفصل 151
.
.
ما احلل النقل دون ذكر المصدر واسم الكاتبة
.
.
[الخفـي الابيـض]
.
.
"لو كَانت مشاعِرنا تظهر علينا لكُنا لوحة فنية"
{أوسامي ..♪}
-
-
اخذت كوب قهوتي وانا اتنهد واجلس بجنب مهند على الكنب
مر اربع ايام
اربع ايام بدون ماشوف
خالد
او حتى اسمع صوته بالمكان
اتذكر ان فهد جاء واخذني على جنب وسالني سبب تصرفات خالد الغريبة
ماقدرت اقول له
ماكنت قادره اقول له شافني وانا عاريه
صعب صعبب
وش الفكره الي بياخذها عني؟
وش راح يقول عني بينه وبين نفسه.
اتذكر مهند جاء لي وقال ان خالد قال له يتبادل معه الغرف وينام مع سامي ومهند ينام معي.
ماقدرت اتكلم
ولا اللؤم خالد.
مادري كم من الوقت وانا جالسه على الارض
على ارضيه الحمام
ماكنت واعيه بنفسي
الخوف
القلق
التوتر
تملك فكري وجسمي
ماقدرت حتى اتنفس بطريقه طبيعيه.
وعلى رغم ان زين كانت جالسه قدامي جلسة القرفصاء
تناظرني
بهدوء.
لكن ماقدرت ابدا ارجع لعقلي.
حتى سمعت صوت مهند يطق الباب
وينادي باسمي بصوت قلق
زحفت على يديني للمنشفه المعلقه
سحبتها ولفيت كتفي ورجليني
همهمت بصوت حاولت ابين له اني بخير
لكن
دخل بسرعه وسكر الباب وراه
وقف بصدمة
وهو يشوفني
سانده ظهري على الجدار
لافه جسمي بمنشفة بالقوه حاولت اخفي جروح جسمي عن اناظره
مو لاني كنت خايفه يشوف شي من جسمي
لا
لاني ماكنت ابيه يشوف جروح واثار قديمة
مابي يتذكر شي عن طفولتنا.
/ليه جالسه على الارض.
قال وهو يتقدم ومعقد حواجبه وبعيون القلق الكبير.
/طحت.
قلت وانا اللف يديني حول رقبته.
فجأة
قلبي يوجعني.
قعدني على السرير ولف على البطانية
كان فهد واقف عند باب غرفتي واول ماشاف مهند شايلني سكر الباب بسرعه قبل احد يشوف
حالتي.
جالس على ركبته بالارض
قدامي
يناظرني بعيون خائفة.
/زينب.
قال بصوت خلا قلبي يهتز.
همهمت وانا وانا اتفادى النظر لعيونه.
/انا سيفك من العشره سنوات لتسعين وعكازك من الخمسين لمئة.
قال وهو يريح راسه بحضني.
/قولي لي مين الي خلا تعابيرك ب هالشكل؟.
قال وهو يمسك يدي.
/انا طحت على الارض توجعت بس ماقدرت اصرخ خفت انكم تدخلون علي.
قلت وانا احط يدي على راسه.
هو خايف.
/خالد قبل ثلاث ساعات قال لنا انه نسى جواله وبيروح يجيبه بعدها بساعة ليه اتصل خالد و قال لي اتبادل معه بالغرفه؟.
قال وهو يناظرني.
هزيت براسي ببطئ وانا اناظره/مادري.
مهند/قولي لي.
/لوصار فيه شي راح اقول لك ماكنت راح اغطي على المشكلة الكبيره هذي عشان كذا تطمن.
/وجهك كان غريب لي وجهك يشبه تعابير البكاء.
قال وهو يتنهد.
/طحت على رجلي ف.
قاطع كلامي وهو يبعد راسه عن حضني ويناظرني
/انتي شخص ما يظهر هالتعابير عشان جرح صغير مثل هذا.
/راح اقول لك بعد ماتخليني اللبس ملابسي.
قلت وانا اضرب جبهته ب اصبعي.
ابعد عني
وقام من على الارض وتوجه لباب.
مرت ثلاث ساعات من اكتشفني خالد
ثلاث ساعات وانا على الارض
..
بعد ذاك اليوم ماجاء خالد ولا شفت ظله
بالفصل كان يجي يسلم عليهم
ويتجاهلني
لا
حتى نظره مايناظرني
كني وهم.
وفكل مايرن الجرس كان اول واحد يطلع ويختفي
حتى بوقت الاستراحه
ماكنت ادري وين يروح.
اتذكر فارس سالني ليه خالد كذا
فكرت بوش اقول
واول شي طلع في بالي
/تهاوشنا.
تنهد وهو يقول لي/متاكد؟.
وبسبب خالد تأجل اعترافي لفهد
ناظرت مهند بعد ماسمعته يناديني
/جوالك يرن.
قال مهند.
ابتسمت وانا اشوف المتصل
مشاعر.
اتمنى ان هديتي اعجبتها.
مسكت جوال وفتحت الخط
واول شي سمعته
شهقتها!!.
تعدلت بجلستي وانا اقول بقلق/مشاعر.
كانت تبكي بكلمة وكلمة
هديتي اذتها بشي؟.
/هديتي أذتك بشي؟.
قلت بقلق وانا احاول افهم كلامها.
حاولت اخفف عنها بكلماتي وعلى شوي شوي
هدت
/جماله قوي.
قالت مشاعر وهي تمسح خشمها.
واو انا مصدومه
بكت لانها شافت شخص جميل؟
مين راح يبكي على جمال شخص!.
ماتوقعت ان هديتي راح تاثر عليها ب هالشكل.
ابتسمت وانا قول/وش رايك بهديتي؟.
سحبت نفس وهي تقول/ماتوقعت تجيني هديه مثل هذي .. انا وش اسوي؟.
/ان ماعجبتك قولي لي عشان ابدلها.
قلت وانا اخذ رشفه من قهوتي.
/لا انا اقصد زوج امي يرفضه.
قالت بقلق.
/مشاعر.
ناديتها بهدوء.
همهمت لي.
/علميني باول شي حسيتي فيه يوم شفتيه.
قلت وانا اترك كوب قهوتي على الطاوله.
هديتي الي ارسلتها لمشاعر
كانت
شخص.
يتزوجها..
اكيد ماني غبيه ارسل اي احد لشخص اعتز فيه مثل مشاعر وعشان كذا رشحت ثلاث اشخاص.
وكان من بينهم ..
كنت مخططه قبل يومين ارسله لها لكن ماكنت قادره اصير طبيعيه بسبب خالد الي كشفني
وعشان كذا باليوم الي كنت راح اعترف فيه لفهد قررت اني اخليه لمشاعر.
وكيف اقنعته ..
كان قبل ثلاث ايام..
-
-
كنت واقفة قدام بناية السكنية للعامل
متكية على عكازي الخشبية
العامل يناظروني وهم يمشون
لكن بالاخير ماحد اهتم فيني كثير ..
تنهدت وانا اغمض عيوني
اتذكر اخر لحظات الي جيت فيها لبناية السكنية للعمال
والي كان راح يكشفني فيها حمد
{للمراجعة الفصل تم ذكره بعنوان-نهايه التنمر-رقم الفصل مئة واربعة
رقم الفصل بالوابتاد مئة وسبعه}.
ضغطت على زر 4
انتظرت بالداخل المصعد
حتى فتح توجهت لذيك الغرفة ووقفت قدامها
لحظات حتى ضغطت على زر الجرس
ابتسمت وانا اشوفه واقف يناظرني ب ابتسامة
كنت قاعده على الكنب وقدامي التلفزيون
جاء ومعه صينيه فيها حلا وقهوه تركية
جلس قدامي.
/راشد راح ياخذ وقت طويل لين يجي كان اتصلت عليه قبل تجي وتضيع وقت.
قال وهو يصب من الدله التركية لفنجان.
/كنت ادري انه مو فيه واخترت هالوقت لاني جاي عشانك.
ابتسم وهو يمد الفنجان بصحنه الدايري الصغير/زياره غير متوقعه.
اخذت الفنجان من يده شربت رشفه وحطيته على الصحن وحطيت الصحن بالطاوله.
/سمعت انك تحب الاشياء الحلوه ف زدت السكر بالقهوه.
قال وهو يناظرني.
/يسعدني هالشي.
ناظرته وكملت/من زمان ما جلست معك جلسه زي كذا.
اخذ هو فنجان قهوته وهو يحط رجل على رجل ويسند ظهره على الكنب/فعلاً اخر مره جلسنا مع بعض قبل يوم المهرجان.
همهمت وانا ابتسم.
لفتره وحنا ساكتين
نشرب من القهوه وناظر التلفزيون.
/ليه للحين ماتسالني.
قلت وانا اشرب بهدوء من فنجاني واناظر التلفزيون.
/ماحب اتدخل بخصوصيات احد ممكن توجع راسي بعدين.
قال بهدوء وهو يشرب من قهوته.
ضحكت بهدوء وانا اقول/وعشان كذا انت شخص عظيم.
مايلت لجهة الصينيه وانا اخذ من الدله واصب منها قهوه.
/لانك عظيم راح اعرض عليك عرض مره وحده بالعمر تجيك.
قلت وانا اتعدل بجلستي واناظر قهوتي بشرود.
/تزوج وحده من قريباتي.
قلت وانا اشرب من قهوتي بهدوء.
ابتسم مع ضحكه خفيفه وهو يبعد الفنجان عن فمه.
ظل الصمت بالمكان
حتى قلت انا
/اوسامي لا ترفض طلب لزينب النازك.
شربت من قهوتي .
احتدت ملامحه وهو ينزل الفنجان على الطاوله ويناظر التلفزيون بدون مايناظرني.
/انا مو غبية مثل ما انت تتوقع الشي الي عجزت افهمه متى عرفت عني وكيف وليه للحين ساكت.
قلت وانا ابعد نظري عنه.
همهمت وانا افكر بصوت يسمعه/ممكن باللحظه الاوله الي دخلت فيها المدرسه وكنت انت واقف؟او اللحظه الي تكلمت فيه معك لاول مره او اللحظه الي رفعتك فيها وسدحتك على الارض.
اخذت رشفه من القهوه وانا اناظر التلفزيون.
/او من اللحظه الي شفتني فيها بدمي عند باب سكنكم.
/من اللحظه الي ابتسمتي لي فيها.
قال بهدوء وهو يقوم.
راح المطبخ ورجع ومعه كوب ماء.
جلس على الكنب وقال وهو يقرب كوب الماء لفمه/من اللحظه الي دق قلبي فيها وانا اشوفك تبتسمين لي.
ابتسم بغبااء وهو يبعد الكوب/كنت مستغرب من المشاعر الي حسيت فيها.
سند ظهره على الكنب وكمل/كنت شاك وزاد شكي بعد ماشفتك تقربين لراشد راشد من النازك وغريبه من شخص اسمه زياد يقرب لهذي العائلة المتوحشه وعشان كذا بحثت لكن مالقيت صله بينك وبينك راشد استغربت كيف لشخص غير موجود بالحياه يقرب لراشد
كنت عارف انك بنت بس ماكنت عارف ل اي عائلة تكوني.
/لين جت اللحظه الي جاء حمد لسكنكم وباللحظه الي انت دخلت فيها لغرفه راشد والي كان فيها حمد وراشد ورحت لدولاب وفتحته نص فتحه ولقيتني فيه خايفه لا مرعوبه وروحي بتطلع من الخوف.
قلت وانا انزل فنجان القهوه.
اوسامي/لا تقريبا كلامك صحيح لكن الي ماتعرفينه بذيك الليله كنت جاي فعلا لاني ابي اغير ملابسي قبل اروح لقصر الامراء واول مادخلت الغرفه تفاجأت بوجود حمد لكن الي زاد تفاجؤي توتر وقلق راشد الغريب والي اول مره من سبع سنوات اشوف خوفه ب هالشكل.
ابتسم للحظات يتذكر الي صار
بعدها كمل وهو يتنهد/كان بين لحظه ولحظه يناظر الدولاب بشكل غريب ومن ظرافتي قلت بنفسي اكيد مخبي حشيش ولا دخان بالداخل مع اني استبعدت هالشي لان الي اتكلم عنه راشد لكن وش راح يكون غير هالشي هذا؟ كنت اضحك بداخلي ومتحمس للي بداخل الدولاب ماخفي لك صدمتي وتفاجؤي وانا اشوفك بداخل الدولاب رغم اني مافتحته بالكامل بس قدرت اشوف فزعك انا حتى ماقدرت ابعد ابتسامتي مو من الفرح لا لاني انا بعد انفزعت من شوفتك بداخل الدولاب ولو ما رن الجوال ماكان عندي اعذر اني مافتح الدولاب بالكامل بعد ماطلعت من السكن جت في بالي فكره وحده ان البنت الي بمدرستنا والي تقرب لراشد.
ناظرني/زينب النازك.
ابعد نظره عني وقال/والي هي زوجة حمد المستقبليه كنت عارف انها هربت بس ماكنت متوقع ابدا ابدا انها بمدرستنا وعشان كذا غطيت عيوني وسكرت فمي ماشفت شي ولا راح اتكلم بالي شفته مو لاني اعتبرك شخص مهم عندي بس لاني ماكنت ابي تزيد مشاكلي.
{للمراجعة الفصل عنوان-حـمد1-رقم الفصل الثاني والستون
والواتباد رقم الفصل الخامس والستون}
ابتسمت بخفيف/كلامك جرحني.
ناظرني لثواني
بعدها قال/هذا الي كنت مقتنع فيه لكن يوم شفتك تزحف والدم يسيل منك كنت اقنع نفسي ان مالي دخل بالي يصير لنازك ولايهمني لكن ارتجف قلبي وانا اشوف حمد يدخل لسكن ماحسيت بنفسي الا وانا اركض مادري كم مره كنت بطيح من الدرج وبعد مافتحت الباب ولقيتك قاعد مغمي عليك على بابنا مانتظرت اللحطه الي اشوف اذا انتي حيه او ميته لكن حملتك وركضت فيك ولو اني تاخرت لحظه كان حمد شافني وانا شايلك والدم يمليك ويلميني .
تنهد وهو يناظرني/ركضت باتجاه الغابه ودخلتها عشان ماحد يشوفنا وبالصدفه شفته.
اخذت فنجال قهوتي وانا اشرب منها رشفه
ابعدتها وقلت وانا اناظره/رعد؟.
امأ براسه وقال/بالبداية خفت لاني شفت امير المدرسة وانا حاملك ب هالشكل لكن انصدمت وانا اشوفه يركض لي .. لالا اقصد لك بخوف سحبك من يديني وركض بدون مايناظرني.
{للمراجعة الفصل تم ذكره بعنوان-نهايه التنمر-رقم الفصل مئة واربعة
رقم الفصل بالوابتاد مئة وسبعه}.
تنهد/قلت بنفسي ماعاد اتدخل مره ثانيه بتصير المره الاخيره الي ادخب نفسي بمشاكل النازك او اني اتورط فيكم لكن يوم شفت تركي يشيلك وانتي تنزفين متوجه للمستوصف فكرت بنفسي اني ماراح اتدخل صحيح هي راح تنكشف لكن راح اوقف نفسي انا بالاخير شخص غريب.
ناظر الارض بشرود
بعدها ضحك بخفيف وهو يقول/ماحسيت بنفسي الا وانا انتظر تركي يطلع عشان اخذك وابعدك عنهم قبل يجي الممرض والدكتور مع تركي وانا حاملك وامشي فيك على الدرج تفاجأت انك تناظريني بتعب قلت بنفسي يمكن راح تذكرني وعشان كذا حطيتك على الدرج وغطيت زين واتصلت على راشد مدعي نفسي اني شفتك تمشين بتعب.
{للمراجعة فصل بعنوان-هاقد اتى الوقت- رقم الفصل مئةوثمانية
بالواتباد رقم الفصل مئة واثنى عشر}
/كانت عندك فرصه تقول له.
قلت.
/لان عندي الفرصه ماكنت راح اقول راح اسوي من نفسي غبي واتغاضى عن الي يصير.
/يشرفني اسمع هالكلام من ولي عهد سابق.
قلت وانا ابتسم واخذ من قطعه الحلا.
ناظرني بعيون متوسعة متفاجأه.
/شلون.
/مو بس انت الي تعرف عني كل شي.
ناظرته وكملت/ولي عهد قطر تنازلت عن الكرسي بسبب انك تبي تعيش حر دخلت المدرسة المتوسطه وعمره 16 وبسن ال21 قررت تكمل حياتك بالمدرسه عندك سته اخوان واربع بنات انت اوسطهم.
ابتسمت/تبيني اقول لك متى بلغت؟.
/وشلون عرفتي.
قال وهو يناظرني.
ابتسمت وانا اخذ رشفه من الفنجان/مصادري.
#المصدر.
/يسوري.
قالت زينب بابتسامة وهي تدخل مجلس.
/اطلعي برا.
قال بحده وهو يرمي الكتاب عليها.
سكرت الباب بسرعه بعد ماشافت الكتاب يطير لها.
افتحت الباب وهي تدخل راسها وبارزه شفايفها بحزن/ياقاسي.
/وش المصيبه الي جايبتها معك هالمره.
قال وهو يسند ظهره على الكرسي.
دخلت زينب وهي تمشي على عكازه
اجلست قدام ياسر وقالت وهي تفتح جوالها/ياظالمني.
/شتبين.
قال وهو يرجع نظره للاوراق قدامه.
/تامى لابسه فستان ابيض.
قالت زينب وهي تبتسم.
ارتجفت يده وهو يترك القلم
ناظرها
/ياهه جمالها وهي لابسه مايوه اطفال شعرها بشع بالشمس.
ابتسمت زينب وهي تناظر ياسر.
شهقت زينب وهي تطلع اصوات غريبه وتقول/حبيبتييي الحلوه لابس طوق قطوه واجنحه وماسكة قطط صغيره اوووو حبيبتييي السكره.
ناظرت ياسر وقالت/ياحظك راح تتزوج بنت ملاكيه.
ضم يدينه لبعض وقال ب ابتسامة/وش تبين اسوي لك؟.
/اوسامي.
قالت والابتسامة تتوسع.
#
بعد ما غريت ياسر بثلاث صور وارسلت له صوره رابعه وهي نايمة
بعدها بثلاث دقايق اعطها ملف اوسامي.
/تزوج الشخص الي اقول لك عنها وبعدها بسنه عندك القرار انك تخليها على ذمتك او تنفصل عنها لك الحق اذا ماتبي اطفال.
كملت وانا اناظره/شخص من النازك تعطيك ثروه من ممتلكاتها تاكد اني مااخترتك الا اني شايفه فيك الخير والحب
تنهدت وكملت/انت وهي تكملون بعض.
اخذت عكازي وقمت مشيت مبعده عنه
/بالاخير انت ماراح تخسر شي ان واقفت تعرف رقمي.
-
-
بعدها الصباح والي كان اليوم الرابع اتصل علي وقال انه موافق
اكيد بعد مارسلت له مكان اقامة بيت مشاعر.
وفي المغرب اتصلت علي مشاعر
منصدمة من الهديه الي ارسلتها لها.
كان خيار اني ازوجها اخر الاخيارات الموجوده بقائمتي
لكن بما انها ماتبي تخلي امها حزينه
او اني اخلي مشاعر يتيمه
اخترت اني ازوجها من شخص اعرفه وموثوق.
بعد ماراح مهند لنادي جو عندي تركي وفيصل وسامي وباسل
والباقي كانوا بالنادي
اجلسوا عندي وتعشوا
بعدها بساعتين ارجعو لسكن.
وهذي انا الحين
اطفي انوار الغرفه ومشيت بعكازي لسريري
تمددت عليه
وب هاللحظه رن جوالي
/اهلين.
قلت وانا اقعد واسند ظهري
/نمتي؟.
سالني مهند.
/لا باقي انت وينك؟.
مهند/ماراح اجي اليوم.
/ليه؟.
وقبل اسمع رده
ناظرت الباب الي انفتح
دق قلبي بقوه
وانا اشوفه يدخل.
بلعت ريقي وانا اسمع مهند يقول/خالد قال انه بيرجع لغرفته.
/طيب.
قلت وانا اسكر الجوال.
فتح انوار الغرفه وسكر الباب
فتح دولاب
طلع له ملابس لنوم
اخذهم واتجه لسريره
فسخ بنطلونه قدامي!!!
وعلى طول تمددت على السرير وغطيت وجهي بالبطانيه.
نسى اني بنت؟.
لا والحين وانا افكر
هو ماناظرني حتى يوم دخل الغرفه
كني مو موجوده
يتجاهلني.
مو كأن هالشي يحزني
بس ابي اتطمن انه ماراح يقول شي لاحد ويظل ساكت عن سري.
استغربت من هدوء المكان
ف ابعدت البطانيه عن وجهي.
استغربت ان الانوار طافيه
ناظرت سريره
لقيته نايم معطيني ظهره.
ابي اتكلم ابي اتناقش معه لكن
صوتي رافض يطلع
ابي اقوم واجلس قريب منه
لكن جسمي يرفض اطاعتي.
وش اسوي..
.
.
ومن هنا نوقف ونكمل بالفصل الجاي
اتمنى انه نال اعجابكم.
واخيرا احد الاسرار الثلاث انكشفت😩.
بأذن الله الفصل القادم يوم
{الاحــــــــــــــــــــــــــــــــــــد}
{الوقت غير معـــــــــــروف} 🙂
يارب ماحد يسالني متى الفصل😭.
رايكم بالفصل والسبب🌝.
احساسيكم وانتم تقرون هالفصل.🌝؟.
انتظرونيي🔥♥️
اعطوني تعليقاتكم وتوقعاتكم
ولا تنسوا انكم سبب نجاح الروايه.
الانستقرامmarie.g0
وهبــي هبــي مــاري ❤
تعليقات
إرسال تعليق