السلام عليكم ورحمة الله وبركاته
.
.
مئه واثنين واربعين بنت بمدرسه عيال اغنياء
.
.
ما احلل النقل دون ذكر المصدر واسم الكاتبة
.
.
[ذكريـات]
.
.
"في كل مكان يوجد شيطان بمظهر الملائكة"
#مهـند..♪.
كل الشباب كانوا موجودين على طاوله حتى حمد
كان الجو غريب بينهم
مهند كان يفكر بزينب وراح يموت من كثير التفكير.
يوم شاف حمد قدامه لاارادياً تراجع لورا وهو متوسع العيون.
ابتسم حمد له وقال/هذي ثاني لليوم شخص ينصدم من وجودي.
تعاده وهو يقول بهمس يسمعه مهند
/كنكم ماتبوني و مخبين عني شي.
ناظره مهند وهو يبتسم ويضمه/اهه اشتقت لحبي.
وقف حمد وناظره ف ابعد مهند وقال بحزن مصطنع/اهه كسرت قلبي.
ابعد عن مهند وناظر الشباب
كانوا متوترين بسبب زياد وحالته الغريبه وهالشي بين بوجههم
/هذي اول مره اشوفكم ب هالتوتر.
قال حمد.
وهنا زاد خوف مهند من انهم يتكلمون بشي يفضح زينب
بحكم ان حمد داهي وذكي.
طرف خيط ويكشفهم.
ولاهو يقدر يستأذن ويروح يشوف حاله زينب توتر صغير من مهند بيكشف كل شي لحمد.
وهنا مضطر يفعل التمثيل عنده.
وقبل لاحد يتكلم قال فارس وهو يشيل عنه مئزره/قبل تدخل بلحظات اتصل علينا زميل لنا وقال ان واحد من طلاب فصلنا تعرض لتنمر وتاذى لضرر كبير لدرجه دخل المستشفى الزميل المتاذي شخص طيب ودايم يساعدنا عشان كذا قلقنا وكنا راح نروح بس بما انك جيت راح نأجل روحتنا لبكرا.
فارس يكذب!!!!!.
صدمة الشباب كانت قويه
بمعرفتهم لفارس مستحيل يكذب ومستحيل حتى لو كان الكذبه متعلقه بحياته
شخص مثل فارس يكذب هذي كانت صدمه لشباب
ومع ذلك
مابينوا صدمتهم
وهنا الشي الثاني
اذا كذب شخص كفارس يعني هالشي ضروري
وعشان كذا كملوا الكذبه معه
سامي/اي ماتوقعت شخص مثل هالزميل يتم التنمر عليه.
تركي/خلونا بكرا نروح ونجلد الي تنمرو عليه.
فيصل/راح اتاكد من ياسر يعذبهم حتى الموت.
سامي/يالله شخص مسكين زي هذا يتنمرون عليه.
وقبل احد يتكلم قال فارس وهو يناظر حمد/خلاص تجهيز العشا روح مع الشباب واجلسوا وانا بحط الاكل.
ابتسم حمد وهو يمشي للغرفه.
وقبل لا يهجون كل الشباب مسك اثنين مع كتوفهم وقال ب ابتسامه حاده
/وين رايحين؟.
تنهد سامي واحمد بنزعاج وهم بمشون قدام فارس للمطبخ
يساعدونه بشيل الاكل.
وهذا هم جالسين على طاوله الاكل
كل واحد فيهم يفكر بحاله زياد ووين وصل ووش سوا.
نزل ملعقته حمد وقال وهو يتكى على الكرسي/جو التوتر هذا ماحبه لو داري كذا كان ماجيت.
ناظر مهند بحده وقال/سوي خير بحياتك وافيدني.
ورجع نظره لشباب وقال/إذا كنتوا قلقين عليه روحوا له.
/حياتي كلها كانت توتر وقلق.
مسد جبينه ب اصبعه وهو يكمل بهمس شبه مسموع/وزاد هالشي مع هروب ذيك السافله.
قام عن الكرسي واتجهه للخارج وقبل يبعد عنهم قام باسل وسامي بسرعه ومسكوه.
باسل دخل يده بين يدينه وقال وهو يتكي ع كتفه ويقول ب ابتسامه غبيه/حمودي ماتدري شكثر مشتاق لك.
وقف حمد وناظره
ف ابعد باسل بسرعه وهو يقول بحزن/كسرت قلبي ب هالنظارات.
سامي حضن يده وقال/من زمان ما اكلنا مع بعض وحتى فارس كثر بالاكل.
ناظره حمد وهو يقول ب ابتسامه/ياسرع الدنيا قبل كنت ارميكم برجلي وتطيرون تسع امتار.
ناظر باسل وكمل/والحين توصلون لطولي وبعضكم اطول مني.
ضحك باسل وقال/اي كنت حنون مره.
اسحبوه لطاوله وجلسوه.
فيصل/ماصدقنا متى تجي وتروح ب هالبساطه.
حط رجل على رجل وقال/اشوف فيه ناس ماهم مبسوطين بجيتي صح مهند.
قال اسمه وهو يناظره ب ابتسامه.
ابتسم مهند وهو يقول/لا اسعدتني شوفتك.
سحب ملعقته وكمل/من بعد فتره طويله.
ابتسم حمد.
وكل واحد بدا يحط له اكل
ناظر الطاوله وب اصناف البحريه
احتار من اي طبق يختار اول وبين الاطباق لاحظ ان فيه طبق ماكان من صنف البحريات.
مافكر كثير ومد صحنه وملعقته واخذ شوي منه.
من زمان ما اكل من صنف المعكرونه البشاميل.
ودام الي سواها فارس اكيد راح تطلع لذيذه.
حط الملعقه على الطاوله بهدوء وناظر فارس لثواني
الي كان يتكلم مع خالد.
/من مين متعلم طريقه.
قال حمد وهو يناظر فارس بهدوء.
رجع ظهره لورا يريحه على الكرسي وناظره
كل الي بالطاوله يدرون ان النظره هذي وراها مصيبه
نظراته لفارس خلتهم يهدون ويناظرونه بترقب
لو هجم على فارس
راح يكونون مستعدين لحمايته.
/شخصين ب هالعالم يقدرون يسون هالطبق والوصفات وتوقع مين.
قام من على الكرسي ومشى من ورا الشباب القاعدين وعيونه تناظر فارس بدون مايرمش
حمد/انا.
وقف ورا فارس وحط يديه على كتفه وقال
/وزينب.
كاس قزاز مشروب غازي كان بجانب صحن فارس
مسكه حمد ورماه بقوه ل مهند وعلى راسه
بعد ماشافه راح يتكلم.
تكسرت الكاسه القزاز براسه ف سكت وناظره بهدوء
مع راسه النازف.
سامي اول ماشاف راسه ينزف قام بسرعه يلحق عليه
لكن.
من تحت الطاوله مسكه خالد وضغط عليه وهو يرجعه لمكانه.
من التحت الطاوله الكل كان شاد يده على حاله مهند
وشوفت صديقهم براس نازف ولاهم قادرين يسون شي.
لو تحرك سامي كان انتهى اليوم ب اصابات وموت اشخاص على الي جالسين بطاوله.
هم يعرفون كيف نوبات غضب حمد
مستحيل يخاطرون
وهالشي ينطبق على مهند الي ظل جالس بمكانه يناظر حمد بهدوء ولا كأن راسه راح يفقد دم.
ولا كأن شي صار.
وب هاللحظه فارس مال و رفع راسه وناظر حمد الواقف وراه يناظره بنظرات يقشعر له البدن.
وقال/مادري وش بالضبط تفكر فيه ولا ادري وش تخيلت مادري اذا كان هالشي راح يأثر على صداقتنا ومعرفتنا ببعض لكن والشي الي لازم تعرفه انه مستحيل نسوي شي يفرقنا عن شخص اعتبرانه من العائله او يسبب خيانه مع بعضنا.
بعدها رجع نظره لقدام وبعدها ناظر مهند وقال/ولا ادري وش السبب الغريب الي خلاك تضرب شخص يسترزق قوت يومه بجسمه المهم وشخص من اهلك المهمين.
بعدها ناظره وكمل/وكيف عرفت اسوي طريقه المعكرونه مهند قال لي اسويها لانه عرف انك بتجي وتوقع ان هالشي راح يفرحك بعد ماعرفت انك تحب هالطبق لو دريت انه راح يسبب سوء فهم خطير كان ماسويته.
نظراته
وكلامه
وهدوءه
وتصرفه الناضج
خلاه يرجع الهدوء للمكان وعلى حمد الي ابعد يديه عنه وقال/الطعم كيف تفسره؟.
فارس/مثل ماقلت لك مهند هو الي علمني عن المعكرونه وبنفسه الي اشرف على الطعم تدري قعدنا اسبوع كامل حتى وصلت لنفس الطعم الي كنت تسويه وهالشي ينشكر عليه راس الديك.
بعد ماسمع كلامه مشى لمكانه وجلس اراح ظهره على الكرسي وحط يديه على صدره ورجل على رجل ونزل راسه كأنه يكفر.
دقايق مرت على هالوضع الهادي الي كان عليه حمد
حتى بدا يضحك وهو يرفع راسه ويناظرهم.
/للحظات توقعت ان الخاينه كانت معكم.
وقف عن الضحك وهو يتنهد ويرمي صحن المعكرونه باخر الطاوله ويقول/هالقاذره مابي اشوفها على طاوله اكل اذا صرت موجود ولاعاد تسويها.
حط بصحنه من السلطه بجنب السلطعون وقال وهو يسحب ملعقته/روح مسح راسك مابي اشوف شي يسد نفسي عن الاكل.
بعدها ناظر حمد وقال/ساعده.
مهند قام من على الكرسي وحمد-صديقهم-وهو ماسك كومه مناديل وبسرعه حطها على راسه ومشى هو وياه طالعين من الصاله الاكل.
حمد بعد ماحس انهم اطلعوا نزل الملعقه على الطاوله بقوه حتى باسل وسامي نطو وهم جالسين بمكانهم مفزوعين.
اتكى على الطاوله بيده وحط يده بين عيونه وضغطهم بخفيف
وهو يتنهد بحده.
ماكان لازم يرمي عليه الكاسه
لو كان فيه كرسي او طاوله كان راح يكون ارحم من كاسه قزاز.
وبهاللحظه تكلم باسل ب/حمد.
بصوت خفيف.
ومن دون مايرفع راسه ناظره وهو يرفع عيونه ف قال بسرعه باسل/لا خلاص ولغشي.
بلع ريقه وهو يعدل كلمته/ولاشيي.
حمد ابعد عن الطاوله وناظره/وش فيه.
باسل/لاخلاص ولاشي بس اعجبني اسمك.
حمد زم شفايفه وهو يناظر باسل بحده
ف قال باسل بسرعه/بس كنت بعلق على كلامك الاخير بس خلاص مافي داعي.
حمد/خلك رجال وتكلم.
باسل/لا انا مو رجال انا قطوه.
بعدها ضحك وهو يضرب الطاوله بيده.
كل الي بالطاول كانوا يناظرونه بحده وقلق
موقفهم قبل شوي مع رذت فعل حمد كان كافي انهم يخسرون عشر سنوات من اعمارهم والحين باسل يستضرف مع حمد الي كان راح يكسر كتف فارس :).
عم الصمت بالارجاء بعد ماتجاوزت كاسه قزاز من جنب باسل
الي رامها حمد عليه.
حتى باسل الي ماكان مبالي بالي يصير معه سكت وتعدل بجلسته.
تنهد حمد وهو يمسك ملعقته وياكل من السلطه ونفس الشي مع الشباب الي بدو ياكلون.
/طالب ينتحر شي جديد علي ماعهدته بزماني.
قال حمد.
خالد/الزمن يتغير ماعاد صارت الناس زي قبل.
تركي/نفس الشي مع الطلاب كل شي يتغير.
فارس/زمنك كانوا الطلاب طيبين.
حمد/رحتوا لجنازه الطالب.
الشباب/اكيد.
حمد/عطيتوهم.
اماؤ براسهم ب"نعم".
وباللهحظه دخل حمد ومهند.
اجلسو بمكانهم وكل واحد منهم بدا يهم بالأكل.
مهند حط بصحنه رز وسلطه
وقبل يحط الملعقه بفمه شاف ملعقه ثانيه تنمد فيها قطعه سمكه تنحط على الرز
رفع راسه وشاف حمد يبعد يده.
ابتسم وهو يناظره رغم ان حمد كان متجاهله.
ماحد ينكر من الموجودين ان حمد بوقت الغضب يكون قاسي
وبوقت مايرجع لهدوءه
يتندم ويصلح الي سواه.
مهند وهو مبتسم/ايلافيو كثير.
حتى رغم انها صغيره وبالقوه بانت الا انه ابتسم.
هذه كانت احد طرق حمد لمصالحه مهند.
رائد/نرجع لموضوعنا.
ناظره حمد ف قال رائد/مثل ماقلت المدرسه تغيرت بعد هذيك الحادثه.
ناظره مهند وهو يقول/اي حادثه؟.
ناظره رائد بستغراب/ماسمعت عن البنت الي احترقت بالمدرسه؟.
ردت فعل مهند كانت قويه لانه وصدمه وصوت مصدوم/ايش.
كان يتكل رائد مع مهند يقول له القصه
وقبل ينتهي
استغربو من
حمد
وهو يضحك
ويحط المعلقه على الطاوله.
ناظر رائد/مادري بالضبط من وين جايب هالرقم.
حط رجل على رجل وضحك وهو يقول/اربع سنوات؟ وراشد كان معنا!!!.
تنهد وهو يوقف ضحك/متى كانت هالحادثه اهه كانت من زمان حتى انا شخصياً يلا اتذكرها كانت قبل تسع سنوات والاشخاص الي اقدرو ينقذون الوضع الامراء السابقين الخارجين لدفعه 18 وانا منهم والهيثم منهم راشد قبل تسع سنوات كان صغير وانا كنت متخرج من الثانويه ومن جديد داخل الجامعه مرت سنه على تخرجي ذاك الوقت كان تخرج دفعه 19 وبذاك الوقت كانت النهايه لبعض الطلاب.
وقف رائد وهو يقاطع حمد ضارب بيده طاوله الاكل/يعني انا كنت اتوهم؟ انا شفت الحريق قبل اربع س.
بلع ريقه رائد وهو يشوف نظرات حمد له.
/اي انت شهدت على حريق لكن كان حريق لشي ثاني ماكان فيه موتى ولا كان فيه اشخاص عانوا ولا كان فيه بنت احترقت كان فيه جرحه بس اشخاص قليلين انت تشوشت عليك الافكار ف توقعت انها نفس الحادثه وبذاك الوقت فعلاً راشد كان موجود لكن ك طالب جامعي.
ناظرهم واحد واحد وبعد قال/موضوع هالحادث مابي اسمعه ولا ابي احد يتذكره عشان مصلحتكم.
تركي/ليه؟.
حمد/ان كنت تبي تجرب شعور الحرق وانت عايش افتح فمك وتكلم هنا وهناك وخلي ذاك المريض يحرقك وانت حي.
خالد/اجل اشاعه ان اخ الطالب الي انتحر موجود صحيحه؟.
ابتسم حمد على جنب وهو ياخذ ملعقته ياكل.
تركي مسك ملعتقه وقال بهمس مسموع/مو كأنه راح يحرقني.
/اشعل نيران في ببت اهله وهو يبتسم بشوق ويشوف نيران بيته تشتعل باللوان زاهيه.
ناظره حمد وكمل/ليه مايشعلها عليك وانت غريب عليه؟.
رجع نظره لصحن وقال/لاحد يفتح هالموضوع لان حتى انا شخصياً ماراح افكر استفز شخص مريض زي هذا ولاتفكرون تقربون من ذيك الغابه.
بعد مانهى مغضه شرب ماء وقال منهي كلامه/عشان ماتتحولون لرماد منثور.
بضحكه!.
-
-
#الساعة5:15صباحاً.
فتحت عيونها وقامت
ناظرت السرير الي جنبها.
حطت يدها على شعرها ونثرته وقالت/لا تتمادين كثير بالمره الجايه.
وهمها كانت متمدهه على السرير بشعرها المتناثر الطويل حولها
وبفستانها القصير الاسود.
-ليه منعتيني.
زينب/عنده شخص ينتظره.
زين-لو كان يحبها ماكان سوا شي يجيب لها الخزي والعار.
زينب/الله راح يعاقبه.
زين-اذاك.
زينب/كان كسرتي بعض اجزاء جسمه ماكان لازك تتمادين وتستعملين الطعن والفتل.
اختفت زين من السرير وظهرت وهي واقفه قدام زينب
بنظرات شبه غاضبه
مكتفه يديها على صدرها-لو مامنعتيني كان شوهت اعضاءه الداخليه وهو يستاهل وانا ماحس بقطره من الندم.
اختفت
وظهرت قدامها
جالسه على السرير قدام زينب
يتقابلون وجها لوجه.
مدت يدها وحطته على خد زينب
-مافي احد يهمني بالحياه غيرك وغير سلامتك ماراح يحزني موت احد غيرك عشان كذا الي ياذيك يستاهل الموت.
بعدها تلاشت.
تنهدت وهي تقوم من على السرير.
توجهت لدولابها وسحبت الصندوق الي ارسلته عمتها قبل خمس شهور
اخذت العلبه وطلعت العدسه
وتوجهت لحمام.
اطلعت وهي تسكر الباب
شافت قفازاتها على طاوله الزينه.
/فارس راح يطبخ راسي.
قالت بحزن وهي تشوف قفازها المشقوق من النص.
-
-
#خارج المدرسه_أنهار.
ماسكه جوالها
متردده على مين تتصل.
لو اتصلت على رينا راح تاخذ تذكره وتجي بخلال دقايق وتكسر بيت اهل زينب.
ولو اتصلت على سديم راح تجي وهي تبكي
وتخرب شهر عسلها.
ولو اتصلت على سيدرا راح تجيب ليلى وتقتحم بيت جدتها بسكاكين مشتعله.
ومهليل مشغوله ب اختها.
ولو اتصلت على مشاعل راح تخرب حياتهم.
ولو اتصلت على مشاعر راح تقتحم بيتهم بدباب.
وهم مايمزحون
يسونها.
وبقى الحل الوحيد
ريندا.
هي الوحيده الي كانت معها من ايام سن الاربع سنوات
تعرف حياتها بالكامل
وتعرف كيف كانت وكيف
عاشت.
وبسرعه وبدون تفكير اتصلت على ريندا.
لحظات حتى ردت
واول ماسمعت صوتها
بكت انهار
خافت ريندا متوقعه ان شي صار لها وبدت تسالها
لكن
كانت تبكي.
بدت تتكلم معها حتى تهديها
وتفهم منها ايش الي صار لها.
وفعلاً
هدات
رغم ان فيها شهقات خفيفه.
/اذا تبين تتكلمين انا اسمعك.
قالت ريندا.
انهار بشهقه بكائيه خفيفه/تعرفين وش صار لزينب.
ابعدت الجوال عن اذانها بسرعه بعد ماسمعت صراخ ريندا ب/وش صار لها.
انهار/كان فيها شي وهي صغيره وانا توي ادري.
قالت بعيون دامعه.
عم الصمت للحظات
حتى قالت ريندا
/وش عرفتي؟.
انهار/كل شي.
تنهدت ريندا
وبعدها قالت/وشلون عرفتي؟.
انهار/زوجي يصير خالها لزينب.
ريندا بستغراب/اي خال؟.
انهار/غازي.
ريندا/ ذاك الحقير وشلون صرتي زوجته؟ انتي مجنونه ترتبطين بشخص ماتعرفين عنه شي.
انهار/من جديد عرفت انه خالها.
ريندا/دامك عرفتي عن ماضيها اكتميه وقفلي عليه ولاتخلين مخلوق على وجه الارض يعرف عن ماضيها خليها عايشه بذكرياتها الوهميه.
انهار/وشلون تقدرين تقولين كذا زينب عاشت حياه وهميه لها الحق انها تعرف وش صار لها وهي صغيره ليه تخلونها ت.
ريندا/لو تذكرت راح تنسانا ان تذكرت راح ترجع بنت بعمر الست سنوات لو تذكرت راح يتعاضف ألمها بسبب الحزن والذنب وبعدها راح تموت.
قالت مقاطعتها بهدوء.
وهذا زاد ألم انهار
دموعها انهمرت.
/ظلم.
قالت انهار.
ريندا/ولانه ظلم خليها تعيش بحالتها حتى لو تألمت بشوي عادي هذا احسن من انها تتألم طول عمرها وتموت.
تنهدت ريندا وهي تسمع بكاء انهار الي كانت تحاول تخفيه.
للحظه دمعت عيون ريندا
لكن.
/تدرين زينب ماهي سهله هي غبيه وذكيه وقويه وضعيفه ولانها كذا جاهدت من الصغر تحمي احباءها بسبب شعور الماضي الي يلاحقها من الصغر زينب راح تبقى دايم معنا واقف قدامنا ماده يدها لنا عشان كذا لاتخافين ولاتبكين زينب من المستحيل انها تتذكر راح تبقى عايشه معنا.
همهمت انهار.
بعد نص ساعه سكرت ريندا وحطت الجوال على الطاوله
قامت من على الكرسي واتجهت لسرير.
تمددت على السرير
غارقه ب افكارها
انمدت يد تلفها وتقربها له.
ابتسمت وهي تحس بانفاسه على رقبتها.
/مين الي اتصل وقاطع حبنا.
قال وهو ضامها وحابسه بين يديه.
ريندا/صديقه لي.
/قايل لك من قبل قفلي جوالك لاصرت معك.
ريندا وهي مبتسمه/المره الثانيه.
..
سكرت الخط وحطيت جوالي بجنبي.
ماقدر امسك دموعي
وشلون قدرت تتحمل وهي صغيره
لو انا
لو كنت مكانها
ل انهرت بالبؤس والحزن.
هي قويه.
والحين تذكرت وشلون عرفتها.
قبل 7سنوات.
كان عمري 11سنة
كانت حياتي مسالمه نوعاً ما
احب اقعد لحالي ولا اختلط مع الطالبات او حتى مع الاستاذات
افضل اجلس بعالم مسالم وهادي على اختلاط بين الناس.
كنت مقتنعه اقتناع تام ان ساري وريان وعبدالعزيز يكفوني عن العالم ولا احتاج احد غيرهم.
كنت اكثر الأحيان اجلس لحالي واكل لحالي
ساري كانت داخله مدرسه خاصه
وانا مادخلت ورفضت اني ادخل
مع انهم كلهم حاولوا فيني ادخل معاها
لكن رفضت.
باحساس اني مابي اثقل على خالي ولا ابي اكثر عليه يكفي انه اخذ برعايتي واهتم فيني وصرف علي وتحمل مصراف طفله مو من مسؤليته يتحملها
هذا كان كثير وكافي لي.
كنت ممنونه له كثير.
حتى بالرغم من صغر عمري الا ان احساس المسؤليه تكون بداخلي.
احيانا احب اشوف الطالبات يتكشون ويلعبون
وانا اتفرج عليهم واكل
لين جا ذاك اليوم الي انتقلت فيه بنت اصغر من صفي.
وبسبب طولها وحجمها والاصابات الي غالبا تجي عليها
خافوا منها بنات المدرسه
وهذا شي متوقع منهم
فبنت بعمر ال10 سنوات طولها فوق ال144
شي يخوف.
سمعت انها كانت بين فتره وفتره تنتقل من هذي المدرسه لمدرسه ثانيه وكل مارجعت للمدرسه يصير فيها كدمات واصابات.
والي جذب انتباهي ان مافي اي من المعلمات سالوا عن وضعها
وحتى الطالبات ماقدرو يقربون منها لانها بنظرهم تخوف.
كانت دايم تمشي مع بنت اقصر منها وهالسبب الناس اطلقوا على الثنائي الغريب لقب
المساحه والقلم.
لان فعلاً ذيك البنت قصيره مره طولها يوصل لبطن الطويله.
كانت القصيره دايم ملازمتها بكل يوم وبكل لحظه ماكانوا يفترقون.
القصيره كانت قدام الطويله
كانهأ تابع للقصيره.
القصيره كانت دايم تحمل بيده كيس شبس(كيس فيشار-كيس ليز)
او لوح كبير شوكولاته
مستحيل يمر يوم بدون ماتكون حامله احد الاثنين.
والطويله حامله كتاب مايفارق يدها ابداً.
مره من المرات بنت صغيره انعرفت بالتنمر على الطالبات كل بنات المدرسه يخافون منها ويعطونها الي تبي لكن بمقابل انها ماتتنمر عليهم حتى البنات الي اكبر منها كانوا يخافون منها
بذاك اليوم بنت المتنمره اخذت فلوس من احد بنات الصف السادس وكدافع عن نفسها حاولت البنت الكبيره تاخذ فلوسها لكن البنت المتنمره ضربتها وسحبت شعرها وهي تركض
حاولت تدافع عن نفسها لكن البنت كانت اقوا منها.
ومن بعدها صارو البنات يخافون منها اكثر واكثر.
وليه ماحد يعلم الاستاذات
لانها هددتهم انها راح تقص شعر الي تعلم عليها.
ونفس الشي معي ماكنت برا القائمه
كانت تاخذ فلوسي واحيانا اكلي وكثير ماتاخذ اقلامي.
حتى جاء ذاك اليوم
البنت المتنمره راحت للبنت القصيره اول ماشافتها لحالها
اتوقع كانت تنتظر هالفرصه يمكن لانها تخاف من الطويله؟.
وهذي كانت اول مره تتركها الطويله بدون ماتنقل كانت تحتاج تروح للمعلمه.
المتنمره جت لها وقالت لقصيره انها تبي فلوسها وبعض المسليات الي معاها
لكن القصيره رفضت بقوه وحاولت تتجاهلها
بعدها
بعدها
المتنمره مسكت القصيره من شعرها وسحبتها وراها وهي تركض
تحت ألم ذيك القصيره
رغم الالم
مابكت ولا صرخت
كانت تجاهد انها تبعد يد المتنمره.
تحت انظار الطالبات الي كانوا خايفين يقربون.
منظر البنت كسر قلبي
كانت صغيره وقصيره ولو بالغ طويل مشى يمكن ماراح يشوفها من كثر ماهي قصيره.
مادري كيف ومن وين جتني الشجاعه ورغم اني اعرف راح اندم لكن شعور العداله صرخ بداخلي.
وعشان كذا ركضت بسرعه للمتنمره الي ماسكه البنت القصيره ومسكت يدها وشعر البنت احاول ابعدها عنها
لكن
مسكت هي شعري
بيدها الثانيه وركضت فينا
وللاسف بكيت.
وقريباً حسيت بقطره من الندم.
وشعور العداله والشجاعه طار في مهب الريح.
انا كنت ازحف وهي ماسكه شعري واحاول ابعدها وابكي والقصيره كانت تمشي بخطواتها وتحاول تبعدها عنها.
"اهه ليه انا دخلت نفسي ب هالشي
وكسرت عالمي المسالم؟."
هذا الي كنت افكر فيه.
بعدها
وفجأه
شفت البنت تتركنا وهي تصرخ.
بعد ماوقفت.
رفعت راسي اناظر السبب
وتفاجأت بالطويله ماسكه المتنمره مع رقبتها وشاده عليها
بعيون حاده
وملامح قاسيه
حتى انا خفت
ولامره شفتها بملامح ولا مره شفتها بالقسوه.
بعد ماتركت شعرنا
الطويله تركل المتنمره
طاحت على الارض ماسكه صدرها متألمه تبكي.
كيف لبنت نحيفه تركل متنمره سمينه!
بعيد عن الحجم
البنت الطويله كانت نحيفه تحس ان نسمه هوا راح يقسمها لنصفين
على عكس المتنمره كانت سمينه لكن طويله
ماتوصل لطول ذيك البنت
لكن كانت تعتبر بطول مناسب لسنها.
الطويله مشت بخطوات سريعه تكمل على المتنمره الي كانت تبكي
لكن اوقفتها القصيره وهي تضمها وتهديها.
بعدها جو اربع مدرسات يشوفون وش صار.
اكثريه الطالبات كانوا موجودين يشوفون الي صار.
ومن بعدها
انتشرت اشاعه غريبه وطفوليه.
ان الطويله كانت كبيره واخذت حبه وصارت صغيره.:).
نفس قصة كونان الي كل الناس حبو قصته.
واشاعه ان اهلها مجرمين وسفاحين بسبب الكدمات والكسور الي نشوفها عليها احيانا.
تحسبوني ماصدقت؟
لا للاسف صدقت الاشاعه
كل البنات زاد خوفهم من قربهم لطويله
حتى نظر لها ماينظرونها من خوفهم.
ولاني كنت صغيره صدقت الاشاعه الغبيه
واشكر ربي كثير اني ماقلت لريان ولا كان راح يذكرني فيها لين اموت.
ومره من المرات بعد مامرت فتره طويله احد البنات قالت كلام للقصيره بكلام مايقوله اطفال.
لكن القصيره بقت هاديه وهي تاكل لوح الشوكولاته الكبير
ابعدته عن فمها وهي تناظر البنت الي سبتها.
القصيره ناظرت الطويله وقالت وهي تاشر عليها وتبتسم بخبث
/شقي فمها.
وبدون اي تردد تقدمت الطويله وهي ترفع عن اكمامها وتناظرها ب ابتسامه يقشعر لها البدن.
اركضت البنت وهي خايفه مبعده عن الطويله الي كانت راح تهجم عليها.
وبيوم تخرج الصف السادس كانت المدرسه مسويه لهم حفل الكل جاء وحظر حفله التخرج
بذاك اليوم جلست بالفصل انا اقرا كتابي بصفي -صف خامس-
حسيت بالملل وطلعت من الصف وتوجهت لدوره المياه اعدل شكلي قبل انزل للحفله.
واول مادخلت شفت الطويله والقصيره
القصيره تزين شعرها والطويله واقفه وراها تناظرها
ويوم دخلت ناظروني
حسيت بالتوتر
بس مع ذلك ماهتميت.
ابتسمت القصيره وهي تقول لي/شوفي جت البطله الضعيفه.
ناظرتني الطويله.
وانا ناظرتها ب استغراب وقالت وهي تضحك بخفيف/شكراً على هذاك اليوم كل ماجيت اشكرك اشوفك تتجاهليني.
خجلت من كلامها
لاني كنت فعلاً اتجاهلهم
بسبب اني كنت احس بخوف صغير اتجاه الطويله.
بعدها قالت بابتسامه وهي تشير لنفسها/انا اسمي ريندا.
واشارت لطويله الي كانت واقفه وراها/هذي اسمها زينب.
بعدها ناظرتها القصيره الطويله وقالت/زينب رحبي فيها.
ناظرت الطويله
ولقيتها تناظرني
ب
خجل!.
كيف بنت ب هطول والقوه تخجل؟
لو انا مكانها كان خليت كل بنات المدرسه يبوسون راسي:).
ناظرتني ريندا وقالت/هي خجوله مع الناس الي ماتعرفهم.
كانت فعلاً خجوله لكن مع هذا
كانت طيبه وتخاف على اصغر الاشياء.
فمثلاً ضربت بنت لانها داست على دعسوقه
ويوم قلت لها عادي هي حشره
قالت لي"كل شي بالدنيا يستاهل يعيش وينعطى فرصه ثانيه"
ومره كانت راح تكسر يد بنت لانها كانت تقطع ازهار المدرسه
ومره رفست بنت عشانها تكلمت عني بالسوء.
كانت
ماترضى على اصدقائها احد يلمسهم
ولا ترضى على الاشخاص او الأشياء الضعيفه.
كانت شخص يصعب التواصل معه
كانت شخص ماتقدر تعبر عن دتخلها بسهوله
كانت بنت خجوله وقويه
كانت تواجه صعوبات كثير مع الناس الغرباء.
مع هذا كانت قادره تتواصل مع شخصين بسهوله كامله ريندا وذيك الشخصية
كانت قادره انها تفمها من نظره
كانت قادره بانها تخليها تتواصل مع الناس بشوي شوي
كانت عارفتها اكثر من نفسها
لا اجلست معاها تضحك مصير وتتكلم كثير وتبتسم كثير.
كانت مشاعر.
اكثر شخص فاهم وعارف شخصيه زينب من بعد ريندا.
على كل حال
بشوي شوي صرت امشي معاهم واخذ عليهم
حتى جاء يوم تخرجي
بكيت كثير لاني ممكن ماراح اقدر امشي معاهم مثل قبل وممكن ينسوني.
لكن
زينب ضمتني وهي تقول/راح ازورك.
توقعت انها تكذب علي عشان تهديني وتواسيني
لكن
تفاجأت فيها بعدها بيومين جايه ومعها بوكيه ورد كبير وهديه.
واقفه عند الباب تناظرني
مبتسمه.
كانت صديقه لا
كانت اكثر من كذا
كانت ك اخت لي
احيانا ولو بنقطه احس اني احبها واغليها اكثر من ساري.
كانت دايم دايم واقفه معي ك صديقاتها
وواقفه قدامي تحميني.
كانت ولا زالت شخص احبه.
ومع معرفتي بالي مرت فيه وانا مصدقتها
قلبي ينقسم
وروحي تصرخ علي بغضب
لاني كنت مقتنعه
لا حتى اكثر من كونه اقتنعاء
بأن اكثر شخص متألم
انا.
رفعت جوالي واتصلت عليها من رقمها الجديد ثواني
حتى ردت علي بفرحه.
ابتسمت وعيوني تدمع/احس اني من زمان ماتصلت عليك.
قالت زينب ب ابتسامه/تدرين قبل يومين كنت افكر فيك.
ضحكت وانا اقول/جد ليه.
زينب/ممكن لاني شفت القمر بشكله الكامل وشبهتك عليه.
اهه هذي البنت
ضحكت وانا اقول/للحين ماتعرفين تمدحين.
ضحكت زينب وهي تقول/يوهه اجل باخذ كورسات من عندك.
قلت/لو تبين كورسات خذيها من رينا راح تعطيكِ شهاده بعد ماتتعلمين من عندها.
سمعتها تضحك.
يالله
ليه دايم الاشخاص الي مثلها يعانون؟.
-
-
ابتسمت وهي تسكر الخط وترجع الجوال لجيبها.
ارفعت راسها
وهي ترفع راسها
كانت الابتسامه تختفي ببطى
حل مكانها البرود
وعيون اقسى من الثلج.
تناظر ذاك الشخص الي كان جالس على الكرسي
يناظرها ببرود
وهو ماسك خصارته
الي كانت
تنزف.
ابتسمت وهي تقرب
/وين كنا؟.
-
-
#قبل ايام-خارج المدرسه.
كانت جالسه على الكرسي
قدامها البيانو.
تناظره بشرود وتفكير
ذاك الشخص.
قبل ايام راحت تشري ملابس
دخلت محل
وصادفت ذاك الشخص
كان واقف يناظرها!
كأنه متوقع دخولها
ماهتمت كثير
وابعدت شكها مؤ كانه راح ينتظر ست ساعات!
وضحكت حتى على تفكيرها
ممكن تعذر اي شخص
لكن شخص مشهور
ومشهور عالمي؟
بعيده كل البعد.
هي تتفهم جمالها ووقوع الشباب بجمالها لكن
شوي مفاجأ لشخص مشهور عالمي ك
هاربت.
مشت لقسم الفساتين
وهي تناظرهم
بهاللحظه طلع الموظف من المحل.
ومشى هاربت لها بخطوات شبه سريعه
ماكانت منتبهه.
حتى.
حست
بشخص وراها.
نبض قلبها بقوه
كانت راح تلتفت وتدافع عن نفسها وتسدحه بالارض وتشق راسه بالكعب الي لابسته.
لكن
تفاجأت.
بيديه يحطها حاجز لها
يحاصرها ويمنعها من الخروج.
وقبل ماتلتفت
قرب لها
وبهمس هادي
قال
/اعجبك؟.
احمرت بخجل
وزاد نبضاتها
وتجمدت بمكانها
مغمضه عيونها.
صوته
وانفاسه
وقربه.
اشعلت فتيله لقنبله قويه بقلبها.
ابعد وهو يبتسم ويمشي خارج المحل.
ضربت مفاتيح البيانو بغضب وهي تتذكر.
كيف يتجراء يحاصرها؟.
حتى ان قلبها دق بقوه
"لازم اراجع دكتور"
قالت وهي تتحسس قلبها بنبضاته السريعه
متوقعه أنها مريضه بسبب بنضاتها.
ابتسمت بسخريه وهي تقول بنفسها/وايش هالشعور المريض هذا ليه وجهي صار احمر؟.
بعدها بثواني شهقت بخوف وهي تقول/لايكون مريضه بمرض خطير!.
وبهاللحظه
انطق الباب.
سمحت بدخول الخادمه.
كانت شايله بيدها كيس كرتوني اسود كبير
/مدام هذا من السيد الصغير.
قالت وهي حاملته بيديها.
/حطيه على الطاوله.
حطته واطلعت.
قامت وهي تسرع بخطواتها لذاك الكيس
افتحته وطلعت حافظات اكل
وابتسمت وهي تشوف بطاقه.
"كل عام وانتي دايماً اختي الحبيبة الغاليه عقبال الالف سنه
سويت لك اكل تحبينه كلي وانتي تسمتعين فيه
احبك كثيييييررررر
انتبهي اصحتك
احبك كثثثيييييرر
نامي بدري
احبك كثثيييييير
كلي واهتمي بنفسك
احببكككك كثثثيرررر
من اخوك الي يحبك كثير اكثر الحياه والي راح يسوي لك الاكل حتى تصيرين عجوز جميله والي راح يبقى طول حياته معك
فروسك. "
تنهدت وهي ترمي البطاقه على الطاوله وتاخذ حفاظات الاكل وتهمس/متى راح يوقف عن رسم القلوب.
افتحت الحافظه وشافت اكلها مقسم لاربع اصناف من النوع الايطالي
افتحت الحافظه الثانيه وشافت محشي ملفوف وورق عنب وشوربه.
/راح يخليني سمينه قبل اصير عجوز.
قالت وهي تبتسم بهدوء.
-
-
#المدرسة-قبل ايام بنفس اليوم.
كان فارس جالس قدام الصندوق المرسل من اخته.
وحوله الشباب
معدا مهند الي كان بالنادي.
قال زياد بحماس/افتحه بسرعه.
امأ براسه وهو يبلع ريقه.
اتسعت ابتسامته بفرحه ماتشيلها الارض
وضحكه خفيفه
وهو يشوف هديت اخته
كانت مجموعه عطور ودهن عود مع ساعة.
ابعدهم على جنب واخذ اهم شي.
البطاقه
تبددت الفرحه لحزن
وعبوس
وهو يشوف المكتوب.
استغرب زياد وقرب يشوف وش مكتوب
ضحك زياد وهو يبعد عن فارس.
"بيوم ميلادنا الجاي لا ترسل لي بطاقه فيها قلوب لاني راح احرقها:)
فداء"
باسل بحزن على صديقه ربت على كتفه وقال/كذا هم البنات لا تحزن.
حط يده على عيونه وهو يتنهد بحزن.
.
.
.
ومن هنا نوقف ونكمل بالفصل الجاي
اتمنى انه نال اعجابكم.
انتظرونيي🔥♥️
اعطوني تعليقاتكم وتوقعاتكم
ولا تنسوا انكم سبب نجاح الروايه.
الانستقرامmarie.g0
وهبــي هبــي مــاري.
تعليقات
إرسال تعليق